Tob 9

1 И призва Товиа Рафаила и рече ему: 2 Азариа брате возми с собою отрока и два велблюда, и пойди в Раги Мидииския ко Гаваилу, и принеси ми сребро, и самого приведи ми на брак, 3 понеже закля Рагуил не исходити ми, 4 а отец мой сочисляет дни, и аще премедлю много, скорбети будет зело. 5 И иде Рафаил, и пребысть у Гаваила, и даде ему рукописание: он же изнесе мешцы с печатьми и вдаде ему. 6 И обутреневаста купно и приидоста на брак. И благослови Товиа жену свою.